Андроид қурилмалар учун Zarnews.uz мобил иловаси. Юклаб олиш x

16 ёшли йигитнинг содир этган жинояти ошкор этилди

Жорий йилнинг 28 январь куни 36 ёшли Н.Р. Каттақўрғон шаҳар ИИБга ариза билан мурожаат қилади.

Унда 2020 йил 1 январь кунидан 28 январь кунига қадар бўлган вақт оралиғида, номаълум шахс унинг “Дамариқ” маҳалласида жойлашган уйига ғайриқонуний равишда кириб, умумий миқдори 18.200.000 сўмлик ҳар хил турдаги қимматбаҳо буюмларини яришин равишда ўғирлаб кетганлигини маълум қилган.

Мазкур ҳолат юзасидан Каттақўрғон шаҳар ИИБ ҳузуридаги Тергов бўлими томонидан номаълум шахсга нисбатан Ўзбекистон Республикаси Жиноят кодексининг 169-моддаси 2-қисми “г” банди (уй-жойга ғайриқонуний равишда кириб содир этилган ўғирлик) билан жиноят иши қўзғатилган.

Ўзбекистон Республикаси ИИВ ҳузуридаги Тергов департаменти хабарига кўра, олиб борилган тергов-тезкор ҳаракатлари натижасида ушбу жиноятни вояга етмаган 16 ёшли Р.К. содир этганлиги аниқланган ва ундан айрим қимматбаҳо буюмлар ашёвий далил тариқасида расмийлаштириб олинган.

Вояга етмаган Р.К. гумон қилинувчи тариқасида ишда иштирок этишга жалб қилинган. Ҳозирда дастлабки тергов ҳаракатлари давом эттирилмоқда.