Эрон АҚШ билан музокараларни қайта бошлаш учун шарт қўйди

Эрон АҚШ билан дипломатик музокараларни қайта бошлаш учун бир қатор шартларни илгари сурди. Мамлакат ўт очишни тўхтатиш бўйича музокараларда воситачи бўлишга тайёр эканини билдирган давлатларнинг барча таклифларини рад этган.

Бу ҳақда Ливаннинг Al Mayadeen телеканали маълум қилади.

Эроннинг шартлари келажакда Қўшма Штатлар томонидан тажовуз қилмаслик кафолатлари, компенсация тўланиши ва Эрон ядровий энергетика иншоотларида тўлиқ ядровий ёқилғи циклини жорий этишга розиликни ўз ичига олади.

Айни пайтда можарода иштирокчи мамлакатлар ўртасида ҳужумлар давом этмоқда. Эроннинг Ислом инқилоби қўриқчилари корпуси Яқин Шарқдаги АҚШ ва Исроил объектларига қарши янги зарбалар тўлқини бошланганини эълон қилди. Бу ҳақда Эроннинг Press TV телеканали хабар беради.

Бундан ташқари, АҚШ разведкаси кеча Эрон Ҳормуз бўғозини мина билан тўсишни бошлагани ҳақида маълумот олган.

БААдаги йирик, кунига 922 минг барелгача нефтни қайта ишлаш қувватига эга Абу-Даби давлат нефть компанияси дронлар зарбаси оқибатида ишини тўхтатганини маълум.

Исроил армияси маълум қилишича, ўтган икки кун давомида Теҳронга катта ракеталар ҳужуми уюштирган. Тунда Британияда жойлашган Фэрфорд авиабазасидан АҚШ бомбардимончи самолётлари Эрондаги нишонларга зарба бериш учун парвоз қилган.

Сўнгги маълумотларга кўра, 28 февралдан бошлаб АҚШ ва Исроил томонидан амалга оширилган зарбалар натижасида Эронда ҳалок бўлганлар сони 1 300 нафардан ошган. Бу ҳақда Эроннинг БМТдаги доимий вакили маълум қилди. Қурбонлар орасида ҳарбийлар ҳам, тинч аҳоли вакиллари ҳам бор.

Исроилда Эроннинг ракета ҳужумлари натижасида тахминан 18 киши ҳалок бўлган. АҚШ ҳарбийлари орасида эса тахминан 7 нафар ҳарбийнинг ҳалок бўлгани тасдиқланган, шунингдек, 140–150 нафардан ортиқ киши яраланган.