Samarqand viloyati prokurorining birinchi o‘rinbosari Sarvar Bozorov viloyatimiz aholisiga murojaat yo‘lladi
Assalomu alaykum, hurmatli
Samarqand aholisi ! Aziz Yurtdoshlar !
Viloyatimizdagi mutasaddi idora va tashkilotlar hamda xalqimiz bilan birgalikda barcha sohalarda qonuniylikni mustahkamlash, jinoyatchilikka qarshi kurash borasidagi ishlarimiz davom ettirilmoqda.
Joriy yilning fevral oyida 1312 ta jinoyat hisobga olinib, ushbu jinoyatlarning 20 foizi aniqlanadigan, 30 foizi oldini olish mumkin bo‘lgan va 50 foizi axborot texnologiyalari sohasi bilan bog‘liq jinoyatlarni tashkil etdi.
Bu davrda hisobga olingan jinoyatlarning
411 tasi yoki 31 foizi mahalla hududida sodir qilindi.
Aziz Samarqandliklar !
Davlatimiz rahbarining 1 va 2-sonli qarorlari ijrosi yuzasidan ko‘rilgan choralar natijasida o‘tgan 2 oyda mahallalarimizdagi kriminogen vaziyatning barqarorligini ta’minlash borasida salmoqli ishlar amalga oshirildi.
Xususan, keng jamoatchilik o‘rtasida 2 mingdan ortiq profilaktik tadbirlar o‘tkazilib, mahallalarga 700 ga yaqin kamera va domofon o‘rnatildi, 200 ga yaqin“namunaviy xavfsiz uy” va “namunaviy xavfsiz ko‘cha” tashkil etildi, 3 253 ta ob’yektlar texnik qo‘riqlovga olinib, 102 ta tashvish tugmalari o‘rnatildi.
Ko‘rilgan profilaktik choralar natijasida, joriy yilning o‘tgan davrida qotillik, tan jarohati yetkazish, o‘lim bilan bog‘liq yo‘l- transport hodisalari va avtotransport vositalarini olib qochish kabi jinoyatlarni oshishiga yo‘l qo‘yilmadi.
Shuningdek, viloyatdagi mahallalarning 76 foizida jinoyat sodir etilishining oldi olindi.
Bundan tashqari, 2025 yil 2 oyida viloyatdagi 44 ta mahallalar “qizil” toifada bo‘lgan bo‘lsa, joriy yilning 2 oyida ushbu ko‘rsatkich ikki baravarga kamaytirilishiga erishildi.
Samarqand shahri, Pastdarg‘om va Samarqand tumanlaridagi so‘nggi 5 yildagi kriminogen vaziyati murakkab 10 ta mahallalarning 9 tasi qizil toifadan chiqarildi.
Viloyat prokuraturasi organlari tomonidan bundan buyon ham jinoyatlarni barvaqt oldini olish va huquqbuzarliklarga qarshi kurashish borasida amalga oshirilgan ishlar, sodir bo‘lgan jinoyatlarning asl sabab va omillari kunlik tahlil qilinib, bunga mas’ul bo‘lgan vakolatli organlarning faoliyatiga xolisona baho berib boriladi.
Qadrli viloyatimiz aholisi!
Shu o‘rinda barchangizning e’tiboringizni yana bir jihatga qaratmoqchiman.
Yuqorida ta’kidlanganidek, sodir etilgan jinoyatlarning yarmini hamon axborot texnologiyalari sohasi bilan bog‘liq jinoyatlar tashkil etmoqda.
Oldini olish mumkin bo‘lgan jinoyatlarning salmoqli qismi esa, o‘g‘rilik va firibgarlik jinoyatlaridan iborat bo‘lmoqda.
Qadrli yurtdoshlar !
Jinoyat qurboni bo‘lib qolmaslik maqsadida, avvalo extiyotkorlikka rioya qilishimiz, turli aldovlarga ishonib qolmasligimiz lozim.
Notanish shaxslarning tekshirilmagan va ishonchsiz va’dalariga ishonib qolmang, shaxsiy hisoblaringiz haqida ma’lumotlarni berib qo‘ymang, plastik kartalaringiz kodlari xavfsizligiga e’tibor qarating!
Aziz Samarqandliklar !
Albatta, viloyatimizda jinoyatchilikning oldini olishda va boshqa sohalarda qonuniylikni ta’minlashda, eng avvalo, mahalla ahli, yoshlar
va nuroniy tashkilotlar faollariga, jonkuyar va vatanparvar insonlarga, ularning amaliy yordami
hamda hamkorligiga tayanamiz.
Qonunlarga qat’iy rioya etish, o‘zgalar huquqi, sha’ni va qadr - qimmatini, mol - mulki daxlsizligini hurmat qilish ham qonuniy, ham insoniy burchimiz ekanligini har doim yodda tutishimiz zarur.
E’tiboringiz uchun rahmat!
